Fréttir

10 apr 2018

Innritun stendur yfir

Nú stendur yfir innritun fyrir haustönn 2018. 

  • Forinnritun 10. bekkinga stendur yfir til 13. apríl. 
  • Lokainnritun 10. bekkinga stendur yfir 7. maí - 8. júní.
  • Innritun eldri nemenda stendur yfir frá 6. apríl - 31. maí.
  • Innritun í fjarnám stendur yfir frá 10. apríl til 17. ágúst.

 

Innritun 10. bekkinga og eldri nemenda fer fram á Menntagátt. Innritun í fjarnám fer fram hér.

Frekari upplýsingar um innritun í MÍ má finna hér. Allar frekari upplýsingar um nám við skólann veitir Stella Hjaltadóttir náms- og starfsráðgjafi, stella@misa.is

16 mar 2018

Verknámsblaðið 20/20 komið út

Á dögunum kom út verknámsblaðið 20/20 sem gefið út af öllum iðn- og verkmenntaskólum á Íslandi, samtals 13 skólar. Nafn blaðsins vísar í sameiginlegt markmið skólanna að 20% grunnskólanemenda skrái sig í iðn- og verknám frá og með árinu 20/20. MÍ á í blaðinu tvær greinar. Annars vegar grein um samstarf skólans við 3X Technology um menntun stálsmiða og hins vegar grein um útskrifaðan stálsmið, Ólaf Njál Jakobsson, sem hefur í gegnum starf sitt ferðast víða og má því segja að stálsmíðin hafi opnað fyrir hann heiminn. Blaðinu er dreift til allra 9. og 10. bekkinga á landinu en það er einnig gefið út í rafrænu formi. Greinar skólans eru á bls. 38-39.

 

 

12 mar 2018

Forinnritun 10. bekkinga stendur yfir

Nú stendur yfir til 13. apríl forinnritun 10. bekkinga. Nemendur í 10. bekk fá bréf frá Menntamálastofnun með veflykli að innritunarvef og leiðbeiningum sem afhent erí grunnskólunum. Foreldrar/forráðamenn nemenda fá bréf í pósti frá Menntamálastofnun með upplýsingum um innritunina. Innritunin fer fram í gegnum Menntagátt.is

 

Innritun annarra en 10. bekkinga stendur yfir frá 6. april til 31. maí. Lokainnritun 10. bekkinga fer fram frá 7. maí til 8. júní.

12 mar 2018

Opið hús 20. mars

Þriðjudaginn 20. mars verður opið hús hér í MÍ. Þá bjóðum við velkomna alla þá sem vilja kynna sér námsframboð og starfsemi skólans. Ýmislegt verður í boði svo sem ratleikur og leiðsögn.

8 mar 2018

Geðheilbrigði, geðsjúkdómar og úrræði

Hugrún er félag sem haldið er uppi af áhugasömum háskólanemum sem brenna fyrir því að bæta vitneskju og umræðu um geðheilbrigði, útrýma fordómum og efla ungmenni. Frá stofnun félagsins hefur vinna þess aðallega falist í því fræða framhaldsskólanema um geðheilbrigði, geðsjúkdóma og úrræði.
 
vefsíða Hugrúnar fór í loftið þann 7. mars en þar má nálgast helstu upplýsingar og fræðsluefni um geðheilbrigði og viðeigandi úrræði. Heimasíðan er sett fram með það að markmiði að vera skýr og aðgengileg fyrir ungt fólk.
 
Samhliða opnun heimasíðunnar fór af stað herferðin #Huguð en í henni fékk Hugrún hóp fólks til að deila reynslu sinni af ólíkum geðsjúkdómum og geðröskunum. Herferðinni er ætlað að vekja athygli á geðheilbrigði, fjölbreytileika geðsjúkdóma og þeim úrræðum sem sem standa til boða. Hér má sjá eina af reynslusögunum.
 
Hugum að geðheilbrigði. Verum #Huguð.
 
 
8 mar 2018

Vel heppnaðir Gróskudagar

Á þriðjudag og miðvikudag fóru fram Gróskudagar hér í MÍ. Þá er hefðbundin kennsla brotin upp og boðið upp á ýmiss konar smiðjur í staðinn. Smiðjurnar voru af ýmsum toga og gátu nemendur alls valið sex smiðjur. Smiðjurnar voru: verkstæði MÍ nema, gönguferð um Ísafjörð, Café Lingua, spilagaldrar, borðspil, myndbandakeppni, boccia, jóga, ljósmyndamaraþon, kareoke, kynfræðsla, skíðaganga, víkingaskák, tónlistarsmiðja, fjölmiðlar, skapandi skrif, kvikmyndasmiðja, bokkakökur, ofurhetjur í myndum og teiknimyndasögum, spilavist, út að leika, umhverfissmiðja og fyrirlestur með Heiðari Loga m.a. um lífið með ADHD. Fleiri myndir má finna í albúmi hér á síðunni sem heitir Gróskudagar 2018.

6 mar 2018

Háskólakynning í MÍ fimmtudaginn 8. mars

Á fimmtudaginn kemur, 8. mars, fer fram háskólakynning í MÍ. Kynningin fer fram í Gryfjunni milli kl. 11 og 13. Að henni koma allir háskólar landsins auk þess sem Háskólasetur Vestfjarða og Keilir kynna námsframboð sitt. Allir eru velkomnir á kynninguna.

5 mar 2018

3 verknámsnemendur til Danmerkur

Í gær fóru verknámsnemendur í skólaheimsókn í EUC Lillebælt í Fredericia í Danmörku. Nemendurnir þrír eru Steinn Daníel Þrastarson nemandi í grunndeild málmiðna og vélstjórnarnemarnir Ágúst Orri Valsson og Emil Uni Elvarsson. Munu þeir dvelja í Fredericia í alls þrjár vikur þar sem þeir fara bæði í tíma í skólanum en fara einnig og finna í fyrirtækjum.

Menntaskólinn og EUC Lillebælt, sem er stór verknámsskóli, hafa átt í farsælum samskiptum frá árinu 2011. Á haustin hafa komið danskir nemendur til okkar og á vorin hafa okkar nemendur farið til Danmerkur.

 

28 feb 2018

Sólrisuleikritið Konungur ljónanna

Leikfélag Menntaskólans á Ísafirði í samvinnu við Tónlistarskóla Ísafjarðar frumsýna á föstudaginn söngleikinn Konung ljónanna. Söngleikurinn er byggður á teiknimyndinni Lion King frá Disney og er frábær skemmtun fyrir alla fjölskylduna, unga sem aldna. Leikstjóri sýningarinnar er Ingrid Jónsdóttir og hljómsveitarstjóri er Beata Joó. Sýnt er í Edinborgarhúsinu og fara miðapantanir fram í síma 450 5555.

Sýningar eru á eftirtöldum tímum:

Frumsýning  2. mars kl 20:00
2. sýning       3. mars kl 14:00
3. sýning       5. mars kl 20:00
4. sýning       6. mars kl 20:00
5. sýning       9. mars kl 20:00
6. sýning       10. mars kl 20:00
7. sýning       11. mars kl 16:00
8. sýning       11. mars kl 20:00

 

Verð:

12 ára og eldri: 3500kr.
6-11ára: 3000kr.
3-5ára: 1500kr.
NMÍ: 3000kr.
Öryrkjar og eldri borgarar: 3000kr.
Frítt fyrir börn yngri en 3 ára!