26 apr 2023

Hárgreiðslunemar á ferð og flugi - Erasmus+

Alltaf eitthvað skemmtilegt um að vera hjá nemendum MÍ!

Nú fyrir páska fóru þrjár stúlkur í grunnnámi háriðngreina, þær Arndís, Ásgerður og Védís, til Spánar ásamt Margréti kennara sínum. Um er að ræða Erasmus+ verkefni sem Menntaskólinn á Ísafirði er aðili að.  

Ferðinni var heitið til Bilbao þar sem heimsóttur var hár- og snyrtiskólinn Hermanos Larrinaga. Ferðin var alls 10 dagar þar sem nemendur sóttu tíma í skólanum sem er einkarekinn en styrktur af basknesku ríkisstjórnninni. Ásamt nemendum MÍ voru einnig 4 nemendur frá finnska skólanum Omnia. Heilmikið prógram var í gangi hjá nemendum sem sóttu tíma í Hermanos frá kl. 9:00 - 14:00 og stóðu MÍ stúlkurnar sig með prýði í náminu. 

Eftir skóla höfðu nemendur frjálsan tíma sem var nýttur í að skoða borgina, fara á söfn og fleira. 

Dvölin gekk virkilega vel, skemmtileg upplifun og komust stúlkurnar að því að þær kunnu allt sem sett var fyrir þær í náminu og gengu stoltar og sáttar frá borði.

25 apr 2023

Nemendur MÍ í úrslit Ungra frumkvöðla

Við í MÍ erum ótrúlega stolt af öllum verkefnum/fyrirtækjum nemenda okkar í keppninni Ungir frumkvöðlar.

Sérstakt gleðiefni er að af þeim 30 verkefnum á landsvísu sem komust í úrslit í keppninni í ár, eru tvö þeirra frá nemendum MÍ.

Þau verkefni frá MÍ sem keppa til úrslita í ár eru: 

Árís og Alma.

Á bak við verkefnið Árís eru þær Agnes Þóra Snorradóttir, Katrín Bára Albertsdóttir og Sigrún Betanía Kristjánsdóttir. Stúlkurnar voru í samstarfi við mjólkurframleiðsluna Örnu og hönnuðu laktósafrían ís.

Á bak við verkefnið Ölmu eru þau Anja Karen Traustadóttir, Embla Kleópatra Atladóttir, Guðrún Dagbjört Sigurðardóttir og Guðmundur Atli Kristinsson. Þau hönnuðu náttúrulega sápu úr þara sem er einstaklega góð fyrir viðkvæma og þurra húð, sem og að pokann utan um sápuna má nota sem skrúbb.

Nú halda nemendurnir suður á leið þar sem þau mæta í viðtöl við dómara miðvikudaginn 26. apríl í Arionbanka. Því næst kynna þau vöru sína á sviði þann 27. apríl n.k. og í kjölfar verður verðlaunaafhending.

Óskum við nemendum okkar góðs gengis á lokaspretti keppninnar. 

24 apr 2023

Nemendur í rafmagnsfræði í heimsókn

Nemendur í áfanganum RAFM1HL05 (rafmagnsfræði) fóru í heimsókn til Landsnets og Orkubús Vestfjarða á föstudaginn var. Tilgangur heimsóknarinnar var að kynna sér starfsemi og starfsstöðvar fyrirtækjanna á svæðinu.

Nemendur fengu að skoða varaaflvélar, rafspennistöðvar og háspennubúnað, auk þess skoðuðu þau Kyndistöðina og hvernig rafmagn er leitt frá raforkukerfinu til heimahúsa.

Menntaskólinn þakkar gestgjöfunum fyrir frábærar móttökur og voru nemendur hæstánægðir með góðan og skemmtilegan dag.

11 apr 2023

Vörumessur nemenda í Hugmyndir og nýsköpun

Nemendur í áfanganum Hugmyndir og nýsköpun, brugðu sér af bæ og tóku þátt í Vörumessu Ungra frumkvöðla í Smáralind. Vel tókst til og voru nemendur sjálfum sér og skólanum til sóma.

Einnig fékk Lista- og nýsköpunarbraut MÍ styrk frá Uppbyggingarsjóði Vestfjarða til að halda eigin Vörumessu Ungra frumkvöðla og var hún haldin í Vestrahúsinu á Ísafirði. Þar sýndu nemendur einnig afurðir sínar og var aðsókn framar vonum.

Vörumessurnar eru hluti af þátttöku nemenda í keppninni Ungir frumkvöðlar á Íslandi, en þess má geta að nemendur MÍ hafa náð langt í keppninni. Dómarar í keppninni hér fyrir vestan voru Arna Lára Jónsdóttir bæjarstjóri Ísafjarðarbæjar, Jóhannes Konrad  Weber vélaverkfræðingur, Víðir Ingþórsson frá Nora Seafood og Guðfinna Helgadóttir sem var fulltrúi dómnefndar Ungra frumkvöðla á landsvísu.

Nemendur hafa unnið að hinum ýmsu verkefnum í janúar og febrúar, t.d. samfélagslegri nýsköpun, verk- og viðskiptaáætlun og ýmislegri hugmyndavinnu. Einnig hafa þau heimsótt Kertahúsið, Hverdagssafnið, Kalksalt, Nora Seafood og fengu heimsókn frá Bláma.
Allir nemendurnir eru skráðir í Ungir frumkvöðlar sem tilheyrir alþjóðlegu samtökunum Junior Achievement (JA).

Um miðjan apríl kemur í ljós hvort nemendur MÍ hafi komist í úrslit keppninnar og munu þá í kjölfarið halda suður á leið og kynna afurðir sínar.

Þau verkefni sem tóku þátt í ár eru eftirfarandi:

ALMA
Árís
Fjörður
Skipti hjálp
Fructus aroma
ISL ljós
JGG clothing
Poddi
Muslim Community
Slétt og brugðið
Skurðarbretti
Rafræn kynning
Dósateus
Gervigreindar bloggið
Lilja útgáfa
Máttur ehf.
MommyPot
Svanlind 

Sérstakar þakkir sendum við Vestfjarðastofu og mentorum nemenda í verkefninu:
Albert Högnason
Björg Sveinbjarnardóttir
Gunnar Ingi Hrafnsson
Sædís Ólöf Þórsdóttir

31 mar 2023

Gleðilega páska

Kæru nemendur

Nú erum við komin í páskafrí og hlökkum til að sjá ykkur endurnærð þriðjudaginn 11. apríl.

Með kveðju,
Stjórnendur MÍ

31 mar 2023

Innritun í dagskóla og dreifnám (eldri nemar)

Innritun eldri nema í dagskóla og dreifnám stendur yfir frá 27. apríl til 1. júní 2023.

Innritunin fer fram í gegnum Menntagátt.

Öllum nemendum, í námi eða á leið í nám, stendur til boða að panta viðtal hjá áfanga- og fjarnámsstjóra eða námsráðgjafa og fá aðstoð við áfanga- og námsval.

Hægt er að panta tíma í viðtal hér.

 

 

31 mar 2023

Söngkeppni framhaldsskólanna 2023

Söngkeppni framhaldsskólanna 2023 verður haldinn laugardaginn 1. apríl í Hinu húsinu.

Mariann Raehni og Sylvía Lind Jónsdóttir keppa fyrir hönd MÍ og munu flytja lagið Anyone eftir Demi Lovato.

Keppninni verður streymt í gegnum Stöð2 Vísi kl. 19:00 og hvetjum við alla til að fylgjast með.

Dómnefndina í ár skipa þau Jón Heiðar Halldórsson, Saga Matthildur, Hildur Kristín Stefánsdóttir og Þórunn Clausen.

Atkvæði dómnefndar vega helming á móti atkvæðum sem berast í gegnum símakosningu, þannig það er um að gera að fylgjast með.

Óskum við stelpunum okkar góðs gengis í keppninni

30 mar 2023

Opna húsið

Mánudaginn 27. mars var haldið opið hús í MÍ fyrir elstu bekki grunnskólanna hér á Vestfjörðum.

Opna húsið tókst mjög vel og mættu í kringum 100 nemendur í heimsókn til okkar. Nemendur fengu kynningu á námsframboði, nemendafélaginu og skólastarfinu í fyrirlestrarsal skólans og spurðu ýmissa spurninga. Því næst sungu þær Sylvía Lind og Mariann fyrir okkur lagið sem þær munu flytja í Söngvakeppni framhaldsskólanna laugardaginn 1. apríl. Nemendum var svo skipt upp í 4 hópa sem fengu leiðsögn um byggingar skólans ásamt því að taka þátt í ratleik. Í lokin var öllum boðið í hádegismat í mötuneytinu og dreginn út vinningshafi í ratleiknum og óskum við Önnu Salínu enn og aftur til hamingju.

Hlökkum til að sjá sem flesta nýnema hjá okkur í haust og takk fyrir komuna

23 mar 2023

Nemendur í heimsókn frá Omnia í Espoo

Þessa dagana eru nemendur frá Omnia í Espoo í Finnlandi í heimasókn í skólanum. Um er að ræða nemendaskipti í Erasmus+ verkefni sem Menntaskólinn á Ísafirði er aðili að.

Hjá okkur eru 10 nemendur og 2 kennarar frá Omnia. Nemendurnir stunda nám í Arts and media og vinna nú verkefni hjá okkur í MÍ með nemendum á Lista- og nýsköpunarbraut og fá að kynnast Fablab smiðjunni.

Í apríl fara svo nemendur MÍ í heimsókn til Omnia skólans og kynnast starfsemi og námi þar.

Á meðfylgjandi myndum má sjá samstarf Omnia og MÍ nemenda í myndlistartíma.