Áfangalýsing

Í áfanganum er lögð áhersla á að nemendur geti skilið inntak ritmáls- og talmálstexta sem fjalla um nokkuð sérhæft efni sem þeir þekkja til eða hafa áhuga á. Nemendur eru þjálfaðir í að nota algeng orð og orðasambönd í ræðu og riti. Talþjálfun miðar að því að nemendur læri að orða hugsanir sínar skýrt og skilmerkilega í samtölum og frásögnum. Nemendur eru þjálfaðir í að beita mismunandi stílbrögðum við ritun texta.

Markmið

Lestur

Að nemandi:

• Geti beitt mismunandi lestraraðferðum, þ.e. leitarlestri, yfirlitslestri, hraðlestri og nákvæmnislestri
• Geti skilið inntak texta sem fjalla um nokkuð sérhæft efni, t.d. fréttir og fréttatengt efni í dagblöðum, blaða- og tímaritsgreinar og texta úr alfræðibókum
• Geti lesið einfalda vísindatexta sem ætlaðir eru almenningi
• Geti notfært sér mismunandi hjálpargögn við lestur eftir því hver tilgangurinn er með lestrinum
• Geti lesið lengri bókmenntatexta
• Hafi lesið minnst tvær skáldsögur
• Geti lesið stutta norska og sænska texta byggða á orðaforða sem hann hefur í dönsku

Hlustun

Að nemandi:

• Skilji ríkisdönsku þegar talað er við hann skýrt og á eðlilegum hraða um þekkt efni, t.d. ýmis dægurmál eða reynslu í daglegu lífi
• Skilji megininntak talaðs máls sem tengist myndefni, t.d. í fréttum, kvikmyndum, samtalsþáttum og öðrum þáttum um þekkt efni
• Geti hlustað eftir tilteknum upplýsingum í þekktum textagerðum, t.d. fréttum, veðurlýsingum og leiðbeiningum
• Geti fylgst með og skilið megininntak orðræðu þegar fjallað er um nokkuð sérhæft efni sem hann þekkir vel og/eða hefur áhuga á, t.d. í fyrirlestrum, kvikmyndum, útvarpsþáttum eða sjónvarpi
• Geti hlustað eftir og skilið smáatriði í efni sem tengist efnisflokkunum

Tal

Að nemandi:

• Geti tjáð hugsun sína á dönsku skýrt og skilmerkilega við mismunandi aðstæður og með ólíkan tilgang í huga
• Geti aflað sér upplýsinga símleiðis
• Geti útskýrt og rökstutt mál sitt um efni sem fjallað hefur verið um
• Geti tekið þátt í óformlegum samræðum og beitt algengum orðum og orðasamböndum sem einkenna óformlegt talmál
• Hafi vald á hvatningar- og efasemdaorðum
• Geti notað grunnorðaforða, sem unnið hefur verið með í efnisflokkunum, á eigin forsendum í nýju samhengi
• Geti sagt það sem hann vill á þann hátt sem þjónar aðstæðum hverju sinni
• Geti talað á eðlilegum hraða innan eðlilegra tímamarka
• Geti brugðist við óvæntum aðstæðum og ólíkum viðmælendum á viðeigandi hátt

Ritun
Að nemandi:

• Geti skrifað 40-50 línur viðstöðulaust um efni sem búið er að vinna með
• Geti hagað orðum sínum og málfari í samræmi við efni textans hverju sinni
• Kunni skil á reglum um uppbyggingu texta
• Hafi vald á nokkrum textagerðum, t.d. persónulegum bréfum, hálfformlegum bréfum, kvörtunum, umsóknum, minnisatriðum, endursögnum og frásögnum
• Kunni að beita stílbrögðum, m.a. með því að nota blæbrigði í orðavali
• Geti skrifað lengri texta (t.d. 500-600 orð) með réttri stafsetningu þar sem hann beitir ferlisritun og nýtir hjálpargögn

Málfræði

Að nemandi:

• Geti beitt þolmynd sagna
• Kunni að nota óákveðin fornöfn og ábendingarfornöfn
• Kunni að nota algeng atviksorð
• Kunni skil á forsetningum í algengum orðasamböndum
• Kunni helstu samtengingar
• Kunni skil á réttri orðaröð
• Kunni að nota ákveðinn greini
• Kunni að nota det/der