HÖSK2VA04 - Hönnun skipa

Áfangalýsing:

Til þess að skip geti sinnt og fullnægt tilteknum hönnunarkröfum, þurfa þau að fullnægja fjölbreytilegum hönnunar-, rekstrar-, öryggis- og aðbúnaðarkröfum. Í þessum áfanga er fjallað með mjög almennum hætti um skipið og einstaka hluta þess, m.a með tilliti til nafngifta og þeirra hlutverka sem einstök stoðkerfi um borð í skipum gegna. Kynna skal nemendum teikningar af fyrirkomulagi skipa, teikningar af dæmigerðu geymafyrirkomulagi, teikningar af brunaniðurhólfun og dæmigerðar kerfisteikningar af vélbúnaði og rafbúnaði skipa, Þá skulu nemendur fara um borð í skip og kynna sér fyrirkomulag þess og búnað.

Forkröfur: 

Markmið:

Nemandi skal öðlast þekkingu og skilning á:

  • Helstu tegundum skipa og hlutverki þeirra.
  • Helstu hugtökum og nafngiftum varðandi einstaka skipshluta, búnað skipa og veiðarfæri.
  • Þeim umhverfisþáttum sem ráða álagi á bol og þilför skipa og hafa áhrif á styrk þeirra.
  • Burðargetu skipa, mestu leyfilegu hleðslu, særými og þá krafta sem virka á bol skipa
  • Álagi á skipsbol vegna mismunandi þyngdar- og uppdriftsdreifingar.
  • Áhrifum vinds og öldu á skip, hreyfingar þess, mótvægisaðgerðir og hættur sem eru samfara siglingu á lensi.
  • Áhrifum ísingar á skip og stöðugleika þeirra.
  • Áhrif aukinnar hleðslu skips og djúpristu á álag og styrk bols.
  • Staðbundnu álagi sem veiðarfæri og veiðarfærabúnaður geta haft á skipsbol og þilför.
  • Gildi og nauðsyn vatnsþéttrar niðurhólfunar skipa, áhrifum þess ef vatnsþétt skilrum reynast ekki þétt og reglum sem um það gilda.
  • Gildi og nauðsyn brunaniðurhólfunar í skipum og reglum sem þar um gilda.
  • Þeim vélbúnaði sem myndar framdriftsbúnað skipa, hlutverki búnaðarins, afköstum og þeim stoðkerfum sem þarf til þess að búnaðurinn starfi eðlilega.
  • Raforkuframleiðslu skipa, afköstum, uppbyggingu rafkerfis og helstu neytendum.
  • Stýrisbúnaði skipa, virkni búnaðarins og reglur sem gilda um neyðarstýrisbúnað.
  • Helstu véla- og lagnakerfum í skipum, hlutverk þeirra, uppbyggingu, virkni og helstu einingar sem mynda slík kerfi.
  • Reglum sem gilda um austurkerfi skipa, sjó- bruna- og slökkvikerfi og pælikerfi skipa.
  • Fyrirkomulagi akkerisbúnaðar skipa, legufæra og dráttarbúnaðar.
  • Helsta veiðarfærabúnaði fiskiskipa og þeim búnaði sem notaður er við mismunandi veiðiaðferðir.
  • Helsta öryggisbúnaði skipa, virkni hans og notkun.
  • Lýsing á lögum og reglum sem gilda um eftirlit með skipum, um stafsemi Siglingastofunar Íslands, viðurkenndra skoðunarstöðva, flokkunarfélaga, faggiltra skoðunaraðila með búnaði skipa og um þau skírteini sem gefa skal út til að skip megi vera í förum.
  • Lögum og reglum um skráningu skipa og merkingar á skipum til auðkenningar.

 

Nemandi skal hafa öðlast leikni í að:

  • Ganga frá afla í lestum skipa.
  • Tryggja að sjór komist ekki í vatnsþétt rými skipsins eða geti komist á milli einstakra vatnsþéttra rýma.
  • Hindra að sjór komist inn í lokuð rými eða safnist fyrir á þilfari skips.

 

Nemandi skal geta hagnýtt þá þekkingu og leikni sem hann hefur aflað sér til að:

  • starfa um borð í skipi og taka ákvarðanir varðandi öryggismál.
  • leggja mat á aflþörf skips og gerð skrúfubúnaðar á grundvelli mótstöðuferils til að ná tilteknum ganghraða.
  • leggja mat á eldsneytisnotkun við mismunandi ganghraða á grundvelli upplýsinga um mótstöðuferil skips.
  • leggja mat á stöðugleika skipa og geta lagt til aðgerðir til að leiðrétta stöðugleika.