NÆRI2GR05 - Næringarfræði

Áfangalýsing

Í áfanganum er lögð áhersla á að nemendur öðlist þekkingu á grundvallaratriðum næringarfræðinnar og samspili næringar, heilsu og líkamsþjálfunar. Fjallað er um næringarþörf mannsins, næringargildi og samsetningu helstu matvara. Farið verður í uppbyggingu og samsetningu próteina, fitu og kolvetna. Fjallað verður um vatn, vítamín og steinefni og gerð grein fyrir gildi þessara efna í fæðunni. Matseðlar metnir og samdir og reiknað næringargildi út frá töflum. Ýmsir næringartengdir sjúkdómar ræddir.

Forkröfur: Engar

Markmið:

Nemandi skal hafa öðlast þekkingu og skilning á:

• grundvallaratriðum í næringarfræði.
• samspili næringar og heilsu.
• helstu orkuefnum fæðunnar.
• hlutverki fæðubótarefna sem hluta af fæðuinntöku.

Nemandi skal hafa öðlast leikni í að:

• meta eigin orkubrennslu út frá viðurkenndum töflum.
• meta eigin orkuþörf yfir ákveðinn tíma.
• setja saman matseðla þar sem hollusta og næringargildi er haft að leiðarljósi.

Nemandi skal geta hagnýtt þá almennu þekkingu og leikni sem hann hefur aflað sér til að:

• meta eigin neysluvenjur.
• meta samspil orkuþarfar og orkuneyslu og geta brugðist við ef þetta jafnvægi raskast.
• meta þörf fyrir neyslu fæðubótarefna.