SIÐF2SF05 - Siðfræði heilbrigðisstétta
Áfangalýsing:
Í þessum áfanga er lögð áhersla á hugmyndafræði og gildi sem liggja heilbrigðisþjónustu til grundvallar. Fjallað verður lítillega um helstu kenningar í sögu siðfræðinnar og farið verður í ákveðin grunnhugtök úr siðfræði heilbrigðisþjónustunnar t.d. sjálfræði, velferð, faglegt forræði, skyldur fagfólks og réttindi skjólstæðinga. Áhersla er lögð á siðferði heilbrigðisþjónustu og samskipti fagfólks og skjólstæðinga og einnig eru siðareglur þessara fagstétta skoðaðar. Spurningar á borð við hverjar eru skyldur fagfólks og hver eru réttindi skjólstæðinga verða ræddar. Eru tækniframfarir til góðs? Hver eru helstu álitamál við upphaf lífs og við lok þess? Hverjar eru hugmyndir fólks um réttláta heilbrigðisþjónustu? Spurningar sem þessar verða íhugaðar og skoðaðar fra ýmsum sjónarhornum.
Forkröfur: Engar
Markmið:
Nemandi skal öðlast þekkingu og skilning á:
- þeim gildum sem liggja mannlegri breytni til grundvallar
- helstu hugtökum, markmiðum og aðferðum siðfræðinnar
- helstu skyldum fagfólks og réttindum skjólstæðinga
- skilyrðum siðferðislegs sjálfræðis og réttmæti faglegs forræðis
- forsendum réttlátrar heilbrigðisþjónustu
Nemandi skal hafa öðlast leikni í að:
- beita siðferðilegum hugtökum á markvissan hátt í ræðu og riti
- skoða siðferðileg álitamál út frá fleiri en einu sjónarhorni bæði í ræðu og riti
- greina og leysa úr siðferðisvanda
- greina frá helstu fræðihugmyndum í heilbrigðisþjónustu
Nemandi skal geta hagnýtt þá þekkingu og leikni sem hann hefur aflað sér til að:
- heimfæra þær fræðihugmyndir og hugtök sem fjallað var um í áfanganum yfir á einstök dæmi úr raunveruleikanum
- geta rökstutt hin ýmsu sjónarmið á siðferðilegum álitamálum
- geta tengt þær fræðihugmyndir sem fjallað er um í áfanganum við daglegt líf