Menntaskólinn á Ísafirði hlýtur styrk úr Sprotasjóði

Inga Sæland, mennta- og barnamálaráðherra, ásamt styrkþegum og Braga Þór Svavarssyni stjórnarformanni Sprotasjóðs, í Safnahúsinu

Menntaskólinn á Ísafirði hlaut nýverið styrk úr Sprotasjóði fyrir þróunarverkefni sem miðar að því að efla gæði kennslu og námsmats. Styrkurinn var afhentur við hátíðlega athöfn í Safnahúsinu síðastliðinn laugardag, þar sem Inga Sæland, mennta- og barnamálaráðherra, og Bragi Þór Svavarsson, formaður stjórnar sjóðsins, afhentu styrkina. Fyrir hönd skólans tók Sólrún Geirsdóttir við styrknum.

Sprotasjóður leik-, grunn- og framhaldsskóla úthlutaði að þessu sinni alls 64.370.000 kr. til 20 skólaþróunarverkefna fyrir skólaárið 2026–2027. Sjóðurinn styður við þróun og nýjungar í skólastarfi í samræmi við stefnu stjórnvalda og aðalnámskrá skólastiga, en umsýsla hans er á vegum Rannís. Að þessu sinni bárust 39 umsóknir þar sem sótt var um rúmlega 146 milljónir króna.

Verkefni Menntaskólans á Ísafirði er metnaðarfullt þróunarverkefni sem leggur áherslu á að efla virkni, valdeflingu, sjálfstæði og gagnrýna hugsun nemenda. Byggt er á grunni leiðsagnarnáms og verður unnið með hugmyndafræði hönnunarhugsunar (e. Design Thinking), þar sem kennarar starfa saman í lærdómssamfélagi að þróun, prófun og innleiðingu nýrra kennsluaðferða og námsmats.

Markmið verkefnisins er að þróa lausnir sem nýtast bæði í dagskóla og fjarnámi, með sérstakri áherslu á heilindi, ábyrgð og helgun í námi. Jafnframt er horft til breytts tækniumhverfis með tilkomu gervigreindar og hvernig nýta megi hana á ábyrgan og uppbyggilegan hátt í skólastarfi.

Styrkurinn er mikilvæg viðurkenning á því þróunarstarfi sem unnið er við skólann og mun styðja við áframhaldandi umbætur á kennsluháttum og námsmati til hagsbóta fyrir nemendur og skólasamfélagið í heild.

Hér má sjá þau verkefni sem fengu úthlutaða styrki árið 2026.