Tímatökuhúsið flutt af skólalóð

Á myndinni má sjá Þórhall Snædal afhenda Gauta Geirssyni lyklana að húsinu.

Nýverið var merkum áfanga náð í starfi húsasmíðabrautar Menntaskólans á Ísafirði þegar nemendur fluttu nýsmíðað tímatökuhús upp á skíðasvæðið í Tungudal. Húsið er gjöf til Skíðafélags Ísafjarðar og mun nýtast við tímatöku í alpagreinum.

Verkefnið hófst haustið 2024 og lauk á vorönn 2026. Það var samþætt lykiláföngum í náminu og gaf nemendum tækifæri til að vinna að raunverulegu byggingarverkefni frá upphafi til enda. Þeir komu að grindarsmíði, þakfrágangi og klæðningum og fengu þannig dýrmæta verklega reynslu samhliða bóklegu námi.

Smíðin er skýrt dæmi um hvernig iðnnám við MÍ tengist samfélaginu á beinan og uppbyggilegan hátt. Nemendur skila af sér vönduðu mannvirki sem mun þjóna skíðafólki um ókomna tíð og öðlast um leið mikilvæga reynslu í sínu fagi.