Kæru nemendur og forráðamenn sem og starfsfólk

Eins og kunnugt er hafa almannavarnir lýst yfir neyðarstigi vegna COVID-19 veirunnar. Áfram er mikilvægt að við öll fylgjumst vel með upplýsingum frá almannavarnarnefnd ríkislögreglustjóra og fylgjum fyrirmælum frá þeim. Á heimasíðu skólans, www.misa.is/vidbragdsaaetlun/, má kynna sér viðbragðsáætlun og ýmsar leiðbeiningar.

Nemendur og starfsfólk sem hafa kvef eða inflúensueinkenni eiga að vera heima. Slík veikindi skal tilkynna á netfangið misa@misa.is eða í gegnum INNU. Fái fólk slík einkenni getur það haft samband í símanúmerið 1700 fyrir frekari upplýsingar.

Minnt er á að forðast heimsóknir til aldraðra og þeirra sem veikir eru fyrir til að hindra smit. Ef á heimili ykkar eru slíkir einstaklingar er heimilt að sinna skólanum að heiman, vinsamlegast tilkynnið slíkt til  aðstoðarskólameistara Heiðrúnar Tryggvadóttur, heidrun@misa.is  Það sama á við um nemendur með áhættuþætti fyrir alvarlegri sýkingu COVID-19 (sjá frekari upplýsingar á vef landlæknis, www.landlaeknir.is)

Allar tilkynningar um sóttkví eða einangrun nemenda og starfsfólks þurfa að berast á skrifstofu skólans, s. 450 4400 eða misa@misa.is Þær verða síðan skoðaðar sem einstök tilfelli undir stjórn aðstoðarskólameistara.

Allir þurfa að gæta einstaklega vel að öllu hreinlæti, handþvotti og sprittun. Hreinlæti er mikilvægast í viðbrögðum okkar: Handþvottur með sápu, sprittnotkun og að halda fyrir munn og nef þegar við hnerrum.

Skólinn hefur gripið til ýmissa aðgerða vegna neyðarstigsins. Afgreiðsla í mötuneyti mun frá og með deginum í dag breytast. Starfsfólk mötuneytis mun setja mat á diska fyrir nemendur og starfsfólk. Ótímabundið bann hefur verið sett við nemendaferðum til og frá landinu á vegum skólans en enn er ótímabært að segja til um hvort það bann eigi við um fyrirhugaða Frakklandsferð nemenda í lok apríl. Til viðbótar við þetta hefur verið ákveðið að fresta opnu húsi sem vera átti 17. mars n.k.

Það er gríðarlega mikilvægt við þessar óvenjulegu aðstæður að við stöndum öll saman í skólasamfélaginu. Nú skiptir meginmáli að við tökum á málum út frá ráðleggingum almannavarna og heilbrigðis- og menntayfirvalda og mikilvægt að við höldum ró okkar og yfirvegun og styðjum hvert annað. Stefna skólans er sú að koma til móts við alla nemendur eins og frekast er kostur í þessu óvenjulega ástandi sem nú ríkir.

Þetta er verkefni okkar allra, við þurfum fyrst og fremst að standa saman, sýna ábyrgð til að tryggja að þau sem eru í samfélagi okkar og veikir fyrir séu verndaðir eins og kostur er. Ekki er talið líklegt að ungt og hraust fólk lendi í vanda þó það fái veiruna.

Ef nauðsyn ber að ná í skólann utan vinnutíma hringið í Jón Reyni Sigurvinsson skólameistara, s. 896 4636 eða Heiðrúnu Tryggvadóttur aðstoðarskólameistara s. 849 8815.

Með góðri kveðju,

Heiðrún Tryggvadóttir                         

Aðstoðarskólameistari

Menntaskólinn á Ísafirði

Sími  450 4400

Háskóladeginum á Ísafirði sem vera átti í MÍ fimmtudaginn 12. mars kl. 11.30 hefur verið frestað um óákveðinn tíma.

Þar sem hættustig almannavarna hefur nú verið uppfært í neyðarstig vegna kórónaveirunnar (COVID-19) þá hafa rektorar háskóla landsins, tekið sameiginlega ákvörðun um að Háskóladeginum á Akureyri og Ísafirði skuli að svo stöddu frestað, um óákveðinn tíma.

Gróskudagar eru hluti af Sólrisuviku en þá er hefðbundinni kennslu skipt út 

fyrir smiðjur af ýmsum toga, til dæmis fræðslugöngur um bæinn, 

skapandi skrif, fréttaskrif, ýmis borðspil og víkingaskák, 

borðtennismót, spurningakeppnir, eldamennsku og kleinugerð. 

Skíðagöngusmiðja er ávallt vel sótt og eru þátttakendur

bæði byrjendur og lengra komnir. Smiðjunni stýrir Stella Hjaltadóttir náms- og starfsráðgjafi

skólans og skíðakennari.  

Skíðagöngusmiðjan vekur alltaf mikla lukku meðal nemenda,

eins og sjá má á meðfylgjandi mynd frá skíðagöngu dagsins. 

Ýmsar upplýsingar vegna alvarlegs smitsjúkdóms (COVID-19 kórónaveirunnar) sem mikilvægt er að allir kynnir sér:

Við viljum vekja athygli á sprittstöndum og upplýsingaplakötum um forvarnir í tengslum við smitsjúkdóma sem búið er að setja upp víðs vegar um skólabyggingarnar. Nemendur og starfsfólk eru hvött til að kynna sér forvarnir til að draga úr sýkingarhættu vegna smitsjúkdóma og nýta sér sprittið. Hreinlæti er mikilvægast í viðbrögðum okkar: Handþvottur með sápu, sprittnotkun,  halda fyrir munn og nef þegar við hnerrum og vera heima ef við finnum flensueinkenni og koma þannig í veg fyrir smit.

Ef smellt er á þennan tengil má finna ýmar upplýsingar frá landlæknisembættinu um COVID-19 fyrir börn og unglinga. 

Í ljósi þess að nú hefur hættustigi almannavarna verið lýst yfir vegna COVID-19 kórónaveirunnar áréttar almannavarnadeild ríkislögreglustjóra mikilvægi þess að allir fylgi leiðbeiningum sóttvarnarlæknis. Nýjustu upplýsingar eru ávallt að finna á vef Landlæknisembættisins.

Foreldrar og starfsfólk er beðin um að fylgjast reglulega með nýjustu upplýsingum um þau svæði sem skilgreind eru sem hættusvæði. Ef nemendur/starfsfólk eða fjölskyldur þeirra ferðast um þau svæði, þurfa þau fara í sóttkví skv. leiðbeiningum Landlæknis. Foreldrum barna og starfsfólki með skert ónæmiskerfi eða undirliggjandi öndunarfærasjúkdóma er ráðlagt af heilbrigðisyfirvöldum að ráðfæra sig við viðkomandi sérfræðing eða heimilislækni.

Einstaklingar sem finna fyrir einkennum og hafa mögulega verið útsettir fyrir smiti t.d. vegna ferðalaga eru hvattir til að hringja í síma 1700 og fá leiðbeiningar. Þeir sem verið hafa í nánu samneyti við einstaklinga með staðfesta eða líklega sýkingu verða settir í sóttkví og hið sama á við um þá sem ferðast hafa á undanförnum dögum til skilgreindra hættusvæða.

Sólrisuhátíð NMÍ var sett kl. 12 í dag.

Setningin hófst á skrúðgöngu um bæinn að Edinborgarhúsi þar sem brot úr sólrisuverki ársins, Mamma Mía, var sýnt. 

Fjölbreytt dagskrá stendur síðan alla næstu vikuna.

Dagskrá Sólrisuhátíðar má finna

hér

Gleðilega Sólrisuhátíð!

Í dag komu þrír ráðherrar í heimsókn í MÍ en það voru þau Ásmundur Einar Daðason félags- og barnamálaráðherra, Lilja Alfreðsdóttir mennta- og menningarmálaráðherra og Sigurður Ingi Jóhannsson samgöngu- og sveitarstjórnarráðherra. 

Mennta- og menningarmálaráðherra kynnti í dag aðgerðir í starfs- og tæknimenntamálum, en ráðherra telur það eitt af stærstu hagsmunamálum þjóðarinnar að efla verk- og tækninám í landinu. 

Ráðherrarnir kynntu sér skólastarfið í MÍ og sérstaklega það fjölbreytta verknám sem fer fram innan veggja skólans auk þess að ræða við stjórnendur. Það var ánægjulegt að fá ráðherrana í heimsókn og þökkum við þeim kærlega fyrir. 

Fyrirhugað er að fara af stað með nýtt 6 vikna valnámskeið í Yoga nidra. Kennt verður tvisvar sinnum í viku, á þriðjudögum og fimmtudögum eftir skóla.

Yoga nidra er liggjandi, leidd hugleiðsla og djúpslökun. Áhyggjur, streita og spenna líða burt þegar djúpri slökun er náð. Hver sem er getur stundað Yoga nidra, það þarf bara að mæta á dýnuna í þægilegum fötum. Kennt í MÍ.

Skráning fer fram hjá Heiðrúnu Tryggvadóttur aðstoðarskólameistara (heidrun@misa.is) í síðasta lagi 26. febrúar.

Spennandi Gettu betur viðureign Menntaskólans á Ísafirði og Verzlunarskóla Íslands fór fram föstudagskvöldið 21. febrúar og lauk með sigri Verzlunarskólans með 32 stigum gegn 25.  

Við óskum báðum liðum til hamingju með góða frammistöðu í keppninni.  

Ekkert ferðaveður var frá Ísafirði fimmtudag og föstudag, hvorki með bíl né flugi. Sem betur fer fór Gettu betur lið MÍ suður á miðvikudeginum þegar sá í hvað stefndi samkvæmt veðurspá. Við þökkum kærlega öllum þeim áhorfendum sem svöruðu kallinu og mættu í sjónvarpssal til að styðja MÍ þegar í ljós kom að stuðningslið MÍ kæmist ekki suður með rútu á föstudeginum eins og til stóð vegna veðurs. Vel gert velunnarar MÍ!  

Undanfarnar vikur hafa menntskælingar sem koma að sólrisuleikriti NMÍ æft stíft.

Sólrisuleikritið í ár er söngleikurinn víðförli Mamma Mía og verður verkið frumsýnt í Edinborgarhúsinu föstudaginn 28. febrúar kl. 20.

Leikstjóri sýningarinnar er Skúli Gautason og formaður leikfélagsins er Ásrós Helga Guðmundsdóttir.

Nánari upplýsingar um dagskrá og miðapantanir á Facebook síðu leikritisins:

MAMMA MIA