Skólahald Menntaskólans á Ísafirði hófst mánudaginn 6. janúar með hraðstundatöflu og kennsla hófst samkvæmt stundaskrá þriðjudaginn 7. janúar.

Innritun fyrir vorönn er lokið bæði í fjarnám og dagskóla. 

Nemendur Menntaskólans á Ísafirði hafa aldrei verið fleiri en nú. Alls eru 477 nemendur skráðir í skólann.

Fjarnemum fjölgar stöðugt og eru nú 163.  Af fjarnemum eru 54 nemendur með Menntaskólann á Ísafirði sem sinn heimaskóla. Dagnemum fækkar og eru nú 161 dagnemi í skólanum. Í dreifnámi eru 20 nemendur í húsasmíði, 33 nemendur í námi á A-stigi skipstjórnar og 100 nemendur eru í sjúkraliðanámi.

Skólahald fer ánægjulega af stað með metfjölda nemenda í skólanum. 

Þann 18. desember s.l. var undirritaður styrktarsamningur milli Menntaskólans á Ísafirði og Ísafjarðarbæjar vegna afreksíþróttasviðs. Sex íþróttagreinar eru í boði á afreksíþróttasviðinu; blak, dans, handbolti, knattspyrna, körfubolti og skíðaganga. 

Í samninigi MÍ og Ísafjarðarbæjar er kveðið á um að framlag MÍ sé að skipuleggja starfsemi afreksíþróttasviðsins og semja við þjálfara um þjálfun í sínum greinum, Sjúkraþjálfun Vestfjarða um þrekæfingar og að leggja til kennara og húsnæði. Einnig er  rekstrarkostnaður, kynning og utanumhald í höndum MÍ.  Ísafjarðarbær leggur til 1.911.613 kr. sem eru ætlaðar í launagreiðslur til þjálfara þeirra íþróttagreina sem í boði eru auk þess sem sveitarfélagið leggur til tíma í íþróttahúsinu á Torfnesi sem eru annars ekki í notkun í samráði við forstöðumenn íþróttamannvirkja.

Jón Reynir Sigurvinsson, skólameistari Menntakólans á Ísafirði,og Guðmundur Gunnarsson, bæjarstjóri Ísafjarðarbæjar undirrituðu samninginn. Um 40 nemendur skólans stunda nám við afreksbrautina og var hluti þeirra viðstaddur undirritunina.

Þann 20. desember voru 14 nemendur brautskráðir frá Menntaskólanum á Ísafirði við hátíðlega athöfn í Ísafjarðarkirkju. Einn nemandi var útskrifaður með A-réttindi skipstjórnar og einn nemandi lauk sjúkraliðaprófi. Tólf nemendur útskrifuðust með stúdentspróf. Níu af opinni stúdentsbraut, þar af einn af afreksíþróttasviði. Tveir af félagsvísindabraut og einn lauk stúdentsprófi af fagbraut. Í athöfninni voru skírteini afhent, auk þess sem verðlaun voru veitt fyrir góðan námsárangur og framfarir í námi. Oliver Rähni nemandi á fyrsta ári lék á píanó í athöfninni. Skólinn óskar öllum útskriftarnemum góðs gengis í framtíðinni og þakkar þeim samstarf og samveru undanfarin ár.

Föstudaginn 20. desember verða 14 nemendur brautskráðir frá skólanum. Einn nemandi útskrifast af skipstjórnarbraut A og einn útskrifast sem sjúkraliði. Alls ljúka tólf nemendur stúdentsprófi, níu af opinni stúdentsbraut, tveir af félagsvísindabraut og einn lýkur stúdentsprófi af fagbraut. Brautskráningarathöfnin mun fara fram í Ísafjarðarkirkju og hefst kl. 15. Flutt verður tónlist og verðlaun veitt fyrir góðan námsárangur. Allir eru velkomnir.

Nemendur í áfanganum LOKA3VE02 - Lokaverkefni, munu kynna verkefni sín í fyrirlestrarsal skólans föstudaginn 13. desember. Kynningarnar standa yfir frá kl. 8.10 og eru mjög fjölbreyttar. Nánari upplýsingar eru á meðfylgjandi mynd. Allir eru velkomnir.

Í dag 11. desember er veður farið að ganga niður og viðvaranir almannavarna og Veðurstofu verða fallnar úr gildi hér á svæðinu kl. 9. Skólinn er því opinn í dag og starf í gangi. Í dag er fyrsti námsmatsdagurinn í desember og það setur mark sitt á skólastarfið. Nemendur eiga að hafa fengið upplýsingar um það hjá kennurum sínum ef þeir eiga að mæta í próf eða önnur verkefni í skólanum á námsmatsdögum. Ef veður eða færð koma í veg fyrir að þið getið mætt í skólann þá þurfa nemendur (eða forráðamaður sé nemandi yngri en 18 ára) að tilkynna það með tölvupósti á misa@misa.is.

Vegna ört versnandi veðurs fellur kennsla niður í skólanum í dag. Skrifstofa skólans er einnig lokuð. Vinsamlegast sendið fyrirspurnir ef einhverjar eru á netfangið misa@misa.is  

Almannavarnadeild ríkislögreglustjóra hefur, í samráði við lögreglustjóra allra umdæma landsins, lýst yfir óvissustigi vegna óhagstæðrar veðurspár.

Auk þess mælist almannavarnarnefnd Ísafjarðarbæjar til þess að börn verði heima þriðjudaginn 10. desember. 

Vikan hér í MÍ hefur borið þess merki að það styttist í jólin. Vikan hófst á jólapeysudegi, keppt hefur verið í piparkökuhúsaskreytingum og jólaspurningakeppni auk þess sem stjórn NMÍ bauð nemendum og starfsfólki upp á heitt kakó við komuna í skólann í gærmorgun. Í dag komu síðan leikskólabörn í heimsókn og dönsuðu með nemendum og starfsfólki í kringum jólatréð. Alla vikuna hefur farið fram samkeppni um best jólaskreytta borðið í Gryfjunni og verða úrslitin tilkynnt í kvöld en þá fagna nemendur og starfsfólk fullveldisdeginum í Félagsheimilinu í Bolungarvík.

Fimmtudaginn 28. nóvember verður haldið skólamálaþing í Menntaskólanum á Ísafirði. Þingið verður með þjóðfundarsniði þar sem nemendur og starfsmenn munu taka fyrir 3 málefni sem tengjast skólanum. Þingið hefst kl. 9:10 og lýkur með að boðið verður upp á góðar veitingar. Skólamálaþingið fer fram í Gryfjunni.