11 mar 2024

Val fyrir haustönn 2024

Í dag hefst valtímabil fyrir haustönn 2024 og stendur það yfir til 15. mars.

Nemendur sem ætla að vera áfram í námi í MÍ þurfa að velja sér áfanga, þetta á við um dagskólanemendur og nemendur sem eru með MÍ sem heimaskóla. Opnað verður fyrir umsóknir í almennt fjarnám 2. apríl og verður auglýst nánar síðar.

Hægt er að fá aðstoð hjá aðstoðarskólameistara, áfanga- og fjarnámsstjóra, náms- og starfsráðgjafa, skólameistara og verkefnastjóra við valið. Hægt er að panta tíma hjá þeim á skrifstofu skólans eða með því að bóka tíma hér. 

Nemendur sem stefna á útskrift á haustönn þurfa að panta tíma hjá áfanga- og fjarnámsstjóra eða náms- og starfsráðgjafa til að fara yfir valið.

Hér eru allar upplýsingar um hvernig valið fer fram eftir brautum.

7 mar 2024

MÍ hlýtur styrk úr þróunarsjóði innflytjendamála

Menntaskólinn á Ísafirði hlaut í dag styrk úr þróunarsjóði innflytjendamála en í styrkveitingunni var lögð áhersla á lýðræðislega þátttöku og baráttu gegn fordómum og mismunun.  Alls hlutu 17 verkefni og rannsóknir samtals 50 milljónir króna. Er þetta annað árið í röð sem skólinn hlýtur styrk úr sjóðnum.

Guðbrandur Ingi Guðbrandsson félags- og vinnumarkaðsráðherra afhenti styrkinn í dag og veitti Erna Sigrún Jónsdóttir námsráðgjafi styrknum móttöku fyrir hönd skólans. Verkefnið sem skólinn fékk styrk fyrir ber yfirskriftina Við öll! Menntaskólinn á Ísafirði sem fjölmenningarlegt samfélag. Verkefnið felst í grófum dráttum í að halda vinnustofur fyrir nemendur og skólasamfélagið með það að markmiði dýpka skilning og auka meðvitund skólasamfélagsins á því hvað felst í því að vera hluti af inngildandi og fjölmenningarlegu samfélagi. Styrkupphæðin er 2.200.000 kr.

Við fögnum þessari styrkveitingu mjög og hlökkum til við að hefjast handa og halda áfram að skapa inngildandi og fjölmenningarlegt samfélag í skólanum.

4 mar 2024

Opið hús fyrir grunnskólanema, háskólakynning og vörumessa 13. mars

Miðvikudaginn 13. mars verður mikið um að vera í MÍ en þann dag verður skólinn með opið hús, Háskóladagurinn fer fram og Vörumessa verður haldin. Við hvetjum öll áhugasöm til að kíkja í heimsókn.

 

Opið hús í MÍ kl. 10:00-12:30:

Opið hús verður í MÍ sem er aðallega hugsað fyrir grunnskólanema. Grunnskólum Vestfjarða hefur verið boðið að koma í heimsókn í MÍ milli kl. 10:00 og 12:30. Grunnskólanemendur fá kynningu á námsframboði og skoðunarferð um húsnæði skólans. Í lok heimsóknar er boðið upp á hádegismat í mötuneytinu.

Háskóladagurinn kl. 12:30-14:00:

Sama dag verður Háskólakynning í Gryfjunni kl. 12. Allir 7 háskólarnir á Íslandi kynna þar námsframboð sitt en háskólarnir eru; Háskóli Íslands, Háskólinn í Reykjavík, Háskólinn á Akureyri, Háskólinn á Bifröst, Háskólinn á Hólum, Landbúnaðarháskólinn og Listaháskóli Íslands. Fulltrúar frá Háskólasetri Vestfjarða verða líka með kynningu. Á Háskólakynninguna eru öll velkomin sem hafa áhuga á að kynna sér námsframboð háskólanna. 

 

Vörumessa MÍ kl. 13.00-16:30:

Eftri hádegi verða nemendur í MÍ með Vörumessu ungra frumkvöðla í húsnæði Vestfjarðarstofu við Suðurgötu 12.  Vörumessa Mí er kynning á verkefnum nemenda sem þau vinna í áfanganum Hugmyndir og nýsköpun og er vettvangur fyrir unga frumkvöðla, fyrirtæki og samfélagið að þróa nýjar hugmyndir og lausnir á Vestfjörðum. Áhersla er lögð á samstarf við fyrirtæki/ráðgjafa á svæðinu og sjálfstæða vinnu nemenda að nýsköpunarlausn. Verkefnið undirbýr nemendur fyrir framtíðina og eykur færni þeirra til nýsköpunar, atvinnuþátttöku og atvinnusköpunar.  

 

Hlökkum til að sjá ykkur.

4 mar 2024

Vel heppnuð starfsþróunarferð

Föstudaginn 1. mars sl. var haldinn starfsþróunardagur framhaldsskólanna þar sem starfsfólk úr 24 framhaldsskólum á landinu hittist í sameiginlegri starfsþróun. Um 30 starfsmenn MÍ héldu suður til að hitta kollega sína sem mælt höfðu sér mót í framhaldsskólum vítt og breitt um höfuðborgarsvæðið. Þannig hittust t.a.m. íslenskukennarar í Framhaldsskólanum í Mosfellsbæ, fjármálastjórar í Flensborgarskóla í Hafnarfirði, skjalaverðir í MH og háriðngreinakennarar í Tækniskólanum svo eitthvað sé nefnt. Í skólunum fór fram ýmis konar fræðsla og fundahöld um málefni tengd framhaldsskólum og þeim starfsgreinum sem þar starfa. Dagurinn heppnaðist vonum framar og var starfsfólk skólans sammála um að mikilvægt væri að efla tengsl við starfsfólk annarra framhaldsskóla á landinu og bera saman bækur sínar. Þá var einkar skemmtilegt að líta inn í ólíka framhaldsskóla höfuðborgarsvæðisins og virða fyrir sér aðstöðu og húsnæði.  
 

29 feb 2024

Dýrin í hálsaskógi - miðasala opnar í dag kl. 12

Í ár mun leikfélag Menntaskólans á Ísafirði setja upp barnaleikritið Dýrin í Hálsaskógi eftir Thorbjörn Egner. Nemendur skólans hafa unnið hörðum höndum við uppsetningu leikritsins síðustu vikur og eru mjög spennt að sýna bæjarbúum afraksturinn. Uppsetning leikfélagsins er ávallt stór viðburður í skólastarfinu en hátt í 30 nemendur koma að sýningunni í ár. Sýnt er í Edinborgarhúsinu á Ísafirði og leikstjóri er Birgitta Birgisdóttir. 

Hægt er að kaupa miða á sýninginuna hér 

 

28 feb 2024

Fjölbreyttar smiðjur á gróskudögum

Það voru afar fjölbreyttar og skemmtilegar smiðjur sem nemendum var boðið upp á á Gróskudögum í ár. Má þar nefna sjósund, karíóki, brauðtertugerð, legó, sushi, klifur, prjón, jóga, búningagerð, kleinubakstur og margt margt fleira. Viljum við þakka starfsfólki fyrir vel heppnaðar smiðjur og nemendum fyrir góða og virka þátttöku. Það er alltaf jafn skemmtilegt að brjóta upp skólastarfið og fást við eitthvað annað en hinar hefðbundnu námsgreinar af og til og virtust allir skemmta sér vel. Meðfylgjandi myndir sína brot af því sem fram fór.

22 feb 2024

Sólrisuvika og gróskudagar

Framundan er ein skemmtilegasta vika skólaársins, sjálf Sólrisuvikan. Að fagna komu sólarinnar með sólrisuhátíð hefur verið fastur liður í skólahaldinu síðan árið 1974. Sólrisunefnd nemendafélagsins skipuleggur dagskrá með fjölbreyttum viðburðum í frímínútum, hádegi og á kvöldin. Þá verður óhefðbundin kennsla tvo daga í vikunni en slíkir gróskudagar eru orðnir órjúfanlegur hluti af sólrisuvikunni. Á gróskudögum velja nemendur sér smiðjur í stað hefðbundinna kennslustunda, má þar nefna dæmi eins og brauðtertugerð, kleinubakstur, boccia, útivist, dans, spinning, smíði og hugleiðslu en alls eru rúmlega 40 ólíkar smiðjur í boði í ár.

Sólrisuhátíðin verður sett með skrúðgöngu í hádeginu mánudaginn 26. febrúar og stendur alla vikuna. Leikfélag MÍ mun svo frumsýna Dýrin í Hálsaskógi viku síðar eða föstudaginn 8. mars. Við vonum að sem flest geti notið þess sem boðið verður upp á og hafi gaman af með sól í hjarta.

Nemendur geta valið sér smiðjur á gróskudögum hér:

 Skráning í gróskusmiðjur

 

22 feb 2024

MÍ keppir í Gettu Betur í kvöld

Í kvöld keppir lið skólans í 8 liða úrslitum Gettu Betur. Mótherjinn að þessu sinni er lið Verslunarskóla Íslands og verður viðureignin í beinni útsendingu á RÚV kl. 20:05. Er þetta í þriðja sinn í sögunni sem lið frá MÍ nær svo langt í keppninni. Liðið í ár skipa Daði Hrafn Þorvarðarson, Mariann Raehni, Saga Líf Ágústsdóttir og Signý Stefánsdóttir. Þjálfarar eru þeir Einar Geir Jónasson og Jón Karl Ngosanthiah Karlsson. Í morgun fór rúta frá MÍ til Reykjavíkur með rúmlega 40 nemendur sem munu styðja lið MÍ í sjónvarpssal. Við óskum keppendunum góðs gengis í kvöld.

15 feb 2024

MÍ í 2. sæti meðalstórra stofnana í Stofnun ársins 2023

Menntaskólinn á Ísafirði hlaut í dag viðurkenningu í Stofnun ársins 2023 en skólinn varð í öðru sæti í flokki meðalstórra stofnana (40-89 starfsmenn). Skólinn hlýtur þar með sæmdarheitið fyrirmyndarstofnun. Er þetta í annað skiptið sem skólinn hlýtur viðurkenningu í Stofnun ársins en skólinn var í fyrra hástökkvari ársins og var þá sú ríkisstofnun sem bætti starfskjör starfsmanna best árið 2022.

Stofnun ársins er samstarfsverkefni Sameykis, fjármála- og efnahagsráðuneytisins og Reykjavíkurborgar. Á hverju ári tekur allt starfsfólk skólans, óháð félagsaðild, þátt í könnuninni. Mælingin nær yfir níu ólíka þætti og þannig fæst heilsteypt mynd af innra starfsumhverfi stofnana. Tilgangur með vali á stofnun ársins er að taka eftir og verðlauna vinnustaði sem ná framúrskarandi árangri í mannauðsstjórnun. Þá nýtist könnunin stjórnendum til að vinna að umbótum í stjórnun og starfsumhverfi og á að efla starfsumhverfi félagsfólks og starfsfólks í almannaþjónustu. Niðurstöður könnunarinnar veita afar mikilvægar upplýsingar um starfsumhverfi vinnustaða og samanburð við aðrar stofnanir.

„Við erum mjög stolt af þessum árangri. Hér er ákaflega góður starfsmannahópur og starfsandinn góður. Það er gott að fá samanburðinn við aðrar ríkisstofnanir og sjá að við stöndum okkur vel í þeim samanburði. Við tókum stórt stökk í fyrra og ánægjulegt að við höldum áfram að bæta okkur. Á sama tíma er þessi góði árangur hvatning til að gera enn betur því mannauðurinn er okkar stærsta auðlind“ segir Heiðrún Tryggvadóttir skólameistari.

Hér má sjá niðurstöður allra stofnana sem tóku þátt í könnuninni.

 

14 feb 2024

Vetrarfrí 15. - 19. febrúar

Vetrarfrí er í skólanum 15. - 19. febrúar og því engin kennsla.

Hlökkum til að fá ykkur til baka endurnærð þriðjudaginn 20. febrúar.