Á haustönn 2025 verða sænska 1 og 2 í boði í fjarnámi* við MÍ.

Inntökuskilyrði í sænsku 1 (SÆNS2NB05) eru að nemendur geti lesið, skrifað og talað sænsku.
Inntökuskilyrði í sænsku 2 (SÆNS2NC05) eru að nemendur hafi lokið sænsku 1.

Sótt er um í gegnum umsóknarvef skólans.

Opið er fyrir umsóknir til og með 16. ágúst 2025.

Frekari upplýsingar: fjarnam@misa.is  

*með fyrirvara um næga þátttöku

Lokaverkefnisáfangi er hluti af námi allra nemenda á stúdentsprófsbrautt. Nemendur velja sér verkefni í samráði við kennara áfangans og oft veita einnig aðrir kennarar við skólann handleiðslu.

Vinnan við lokaverkefnið reynir á sjálfstæð vinnubrögð, virkni, frumkvæði og skipulagshæfileika. Er þessum áfanga ætlað að skerpa á undirbúning nemenda fyrir háskólanám, s.s. hvað varðar leikni og hæfni til að afla gagna, leggja mat á og vinna úr gögnum en einnig að deila niðurstöðunum og svara spurningum um verkefnið.

Verkefnum má ljúka á ýmsan hátt, s.s. með heimildaritgerð eða rannsóknarskýrslu, gerð vefsíðu, heimildamyndar eða annars konar hugverks.

Afrakstur lokaverkefna dagkólanema sem sátu lokaverkefnisáfangann á vorönn var kynntur á opnu málþingi í dag. Verkefnin voru fjölbreytt og áhugaverð eins og eftirfarandi yfirlit gefur til kynna:

• Að tala tungumála reiprennandi – aðferðir og skilgreining
• Alzheimers sjúkdómur
• Dýr sem hafa farið út í geim
• Folkið á Horni – fjölskyldusaga
• Handrit að sjónvarpsþætti – fyrirmyndir og sköpun
• Hálftónaaðferð í myndlist
• Heimavistarlíf – að flytja að heiman
• Hin íslenska tunga – móðurmálið og sjálfsmyndin
• Hvernig tengist sjálfsmynd Chicago-búa íþróttum?
• Illska og siðblinda – raðmorðingjar í kvikmyndum
• Íþróttir í leikskóla - leiðbeiningar
• Notkun fæðubótarefna í íþróttum
• Ofbeldishegðun barna
• Pása eða ekki pása eftir framhaldsskóla?
• Raðmorðingjar – hver er ástæðan?
• Samskipti án orða – með tengingu við taugasálfræði og líffræði
• Stéttarskipting innan heilbriðgisstofnana
• Sögusigling um Ísafjarðardjúp – hönnun og skipulag
• Uppruni og saga trommusettsins

Við óskum nemendum í lokaverkefnisáfanganum til hamingju með vel heppnaðar kynningar og áhugaverð verkefni.

Í MÍ er sú ánægjulega hefð við lýði að útskriftarnemar bjóða starfsfólki til kaffisamsætis undir lok síðustu annarinnar í skólanum. Boðið fer yfirleitt fram daginn fyrir dimmission og mæta nemendur og starfsfólk þá gjarnan prúðbúnir. Nemendur bjóða upp á kræsingar á kaffistofu starfsfóks og eiga nemendur og starfsfólk saman notalega stund.

Engin undantekning var frá þessari skemmtilegu hefð í ár eins og meðfylgjandi myndir sýna. Kaffisamsætið var á sínum stað í morgun og fara útskriftarefni nú að búa sig undir dimmission í fyrramálið.

Við þökkum kærlega fyrir okkur.  

Ársskýrsla Menntaskólans á Ísafirði fyrir árið 2024 hefur nú verið birt. Í skýrslunni má finna finna fjölbreyttar upplýsingar um starfsemi skólans auk fjölda mynda úr skólastarfinu. Ársskýrslan er aðgengileg á heimasíðu skólans.

Aðalfundur Nemendafélags MÍ var haldinn í síðustu viku. Að fundinum loknum fluttu frambjóðendur til nýrrar stjórnar framboðsræður sínar og hófust í kjölfarið kosningar í embætti. Tilkynnt var um niðurstöður kosninga með viðhöfn í Tunguskógi. Nýja stjórn NMÍ skipa:

Anna Salína Hilmarsdóttir - Formaður

Ísak Helgi Björnsson - Gjaldkeri

Brynhildur Laila R. Súnadóttir - Ritari

Kristján Hrafn Kristjánsson - Menningarviti

Grétar Logi Sigurðsson - Málfinnur

Anna María Ragnarsdóttir - Formaður leikfélags

Soffía Rún Pálsdóttir - Formaður vídeóráðs

Tristan Ernir Ársælsson - Fulltrúi verknámsnema

Óskum nýjum fulltrúum í stjórn nemendafélagsins til hamingju með kjörið, sem og velfarnaðar í störfum sínum fyrir nemendur MÍ næsta vetur.

Innritun nýnema stendur nú yfir og lýkur 10. júní 2025.

Innritun eldri nema í dagskóla lýkur 26. maí 2025.

Innritunin fer fram rafrænt gegnum island.is

Innritun í fjarnám stendur yfir til 16. ágúst, sjá nánar hér.

Öllum nemendum, í námi eða á leið í nám, stendur til boða að panta viðtal hjá áfanga- og fjarnámsstjóra eða námsráðgjafa og fá aðstoð við áfanga- og námsval.

Hægt er að panta tíma í viðtal rafrænt:

Bóka tíma 

Innritun í fjarnám fyrir haustönn 2025 stendur yfir frá 22. apríl til 16. ágúst 2025.

Sótt er um í gegnum umsóknarvef Innu.

Upplýsingar um fjarnám eru á heimasíðu skólans og áfangaframboð í fjarnámi má sjá hér.

Nánari upplýsingar og fyrirspurnir er hægt að senda á netfangið fjarnam@misa.is

Við erum komin í páskafrí og hlökkum til að sjá ykkur öll endurnærð þriðjudaginn 22.apríl. 

Nemendur MÍ í stálsmíði brugðu sér til Fredericiu í Danmörku þar sem þeir dvelja þessa viku hjá EUC Lillebælt, samstarfsskóla MÍ. Dagskrá hópsins er þétt og góð að sögn Alexíusar Jónassonar, kennara sem fylgir hópnum. Hafa nemendurnir m.a. fengið að vinna hagnýtt verkefni sem er að smíða eldstæði, undir handleiðslu Michaels kennara við EUC.

Nemendurnir byrjuðu á að fá kynningu á verkefninu og teiknuðu síðan smíðastykkið í Inventor-teikniforritinu. Þegar því var lokið hófust nemendur handa við að skera niður parta í laser og eftir það tóku við æfingar í rafsuðu og var góðum tíma varið í þær. Nemendur kláruðu síðan að skera parta, valsa og beygja og að lokum var komið að samsetningu.

Vinnuferlinu er best lýst á meðfylgjandi myndum frá Alexíus og nemendum hans. Ekki er að sjá annað en að þessi dvöl sé að nýtast þeim vel.

Nemendur í háriðn eru þessa dagana staddir í heimsókn hjá Omnia, samstarfskóla MÍ í Espoo í Finnlandi. Novia er stór framhaldsskóli með samtals um 10.000 nemendur og er boðið upp á fjölmargar verknámsbrautir sem fara fram í nokkrum byggingum eða útibúum („campus“). Umhverfið er því nokkuð frábrugðið því sem okkar nemendur hafa fengist að kynnast í MÍ.

Í skólaheimsókninni eru fjórir nemendur og með þeim í för Margrét Skúladóttir kennari. Hafa þær fengið að kynnast og spreyta sig á ýmsum hár- og höfuðmeðferðum í kennslustundum, en einnig fengið að skoða umhverfið utan veggja skólans. Brá hópurinn sér sem dæmi í göngutúr í Haltiu náttúrmiðstöð sem einnig er staðsett Espoo. 

Í haust munu nemendur í háriðn frá Omnia koma í heimsókn í MÍ og mögulega fleiri skóla.