Í dag, fimmtudaginn 23. janúar, var hið árlega sólarkaffi í Menntaskólanum á Ísafirði. Löng hefð er fyrir sólarkaffi innan skólans, þar sem nemendur og starfsfólk fagna komu sólar eftir langa vetursetu handan fjalla.

Það voru að vanda þeir nemendur sem stefna á útskriftarferð í vor sem sáu um að bjóða upp á pönnukökur og fleira góðgæti í Gryfjunni. Á Ísafirði hverfur sólin á bak við fjöll seint í nóvember og birtist aftur í lok janúar. Hinn eiginlegi sólardagur Ísfirðinga er 25. janúar en þann dag sleikja sólargeislarnir húsþökin í Sólgötu, ef veður leyfir. Ísfirðingar hafa ávallt fagnað komu sólarinnar með því að drekka sólarkaffi og gæða sér á pönnukökum og er þessi siður fyrir löngu orðinn fastur liður í skólastarfi MÍ.

Við bjóðum sólina velkomna aftur í bæinn og hlökkum til fleiri sólardaga framundan.

Vekjum athygli á að stöðupróf í pólsku verður haldið á vegum Kvennó þann 4. mars n.k.

Nánari upplýsingar varðandi prófið og aðstoð við skráningu er hægt að fá hjá Mörthu Kristínu áfangastjóra.
Hægt er að panta tíma hér

Í dag kom æskulýðsfulltrúi Ísafjarðarbæjar, Dagný Finnbjörnsdóttir, í heimsókn og ræddi við hóp nemenda úr Ísafjarðarbæ um félagslíf og tómstundaiðkun. Ýmsar hugmyndir um hvernig væri hægt að efla félagslíf ungs fólks á svæðinu komu fram og fór Dagný vel nestuð af fundinum. Nemendahópurinn var nokkurs konar þverskurður af nemendum MÍ hvað varðar aldur, kyn, búsetu, námsbrautir og bakgrunn. Á skólafundi 9. nóvember sl. var ályktað um að skora á Ísafjarðarbæ og önnur sveitarfélögum við Djúp að koma á fót ungmennahúsi eða félagsmiðstöð fyrir fólk á framhaldsskólaaldri og var þessi fundur viðbragð Ísafjarðarbæjar við þeirri áskorun. Við þökkum Dagnýju kærlega fyrir komuna og vonumst til að skilaboð og hugmyndir nemenda komist alla leið í framkvæmd.

Innritun á vorönn er nú lokið í Menntaskólanum á Ísafirði og hafa nemendur aldrei verið fleiri við skólann en þeir eru nú 606 talsins. Næstfjölmennasta önnin til þessa er haustönnin árið 2021 þegar 544 nemendur voru innritaðir.

Af 606 nemendum skólans eru 204 í dagskóla og er heimavistin þétt setin eins og á haustönn. Nemendur frá suðurfjörðum eru þar fjölmennasti hópurinn eða 11 talsins.

Nú á vorönn fer af stað nám í múraraiðn í dreifnámi en það er í fyrsta sinn síðan Menntaskólinn á Ísafirði og Iðnskólinn á Ísafirði voru sameinaðir sem það nám er í boði. Dreifnám er vinsælt námsform innan skólans en það er nám fyrir fólk í vinnu sem kennt er í fjarkennslu og í lotum á kvöldin og um helgar. Húsasmíði, iðnmeistaranám, sjúkraliðanám og vélstjórnarnám A er sömuleiðis kennt í dreifnámi.

Fjarnemendur við skólann eru samtals 335 en fjarnámsnemendum hefur farið fjölgandi síðustu ár. Af þeim eru 116 nemendur í iðnmeistara- og sjúkraliðanámi. Iðnmeistaranámið er samstarfsverkefni MÍ og Verkmenntaskóla Austurlands í Neskaupstað en sjúkraliðanámið er samstarfsverkefni sömu skóla og Fjölbrautaskóla Norðurlands vestra á Sauðárkróki. Af öðrum fjarnemendum, sem eru samtals 202, eru 81 síðan að fylgja námsbrautum innan MÍ og stefna á útskrift frá skólanum að námi loknu.

Hér má sjá hvernig nemendur skólans skiptast eftir ólíkum námsformum:

Í kvöld keppir lið Menntaskólans á Ísafirði í fyrstu viðureign sinni í Gettu betur 2205. Mótherji MÍ að þessu sinni er lið Menntaskólans að Laugarvatni. Í ár eru alls 25 skólar skráðir til leiks og fara fyrstu undanúrslitaumferðirnar fram í beinni útsendingu á rúv.is.

Lið MÍ í árið 2025 er skipað þeim Guðbjörgu Ósk Halldórsdóttur, Grétari Loga Sigurðssyni og Soffíu Rún Pálsdóttur. Aðalþjálfari liðsins er Signý Stefánsdóttir og umsjónamaður og aðstoðarþjálfari er Guðríður Vala Atladóttir. Upphaflega sóttu 14 nemendur um þátttöku í liðinu en eftir fyrstu æfingar var fækkað niður í 6. Að sögn Guðríðar Völu sem skipar embætti Málfinns MÍ í vetur hafa æfingar gengið vel en krefjandi reyndist að velja aðeins þrjá keppendur þar sem margir efnilegir nemendur komu til greina. Við hvetjum áhugasama til að leggja við hlustir á vef ríkisútvarpsins ruv.is í kvöld kl. 19:10.

Hér má finna helstu upplýsingar um upphaf skólastarfs á vorönn 2025:

3. janúar

• Skrifstofa skólans opnar eftir jólafrí
• Stundatafla og námsgagnalisti opna í INNU
• Rafrænar töflubreytingar hefjast
• Skráningu í fjarnám lýkur

5. janúar

• Heimavist opnar eftir jólafrí

6. janúar

• Starfsmannafundur kl. 9:00 í stofu 14.
• Skólastarf hefst kl. 11:30 í Gryfjunni. Kennt skv. stundatöflu frá kl. 11:50.

10. janúar:

• Töflubreytingum lýkur

17. janúar:

• Skráningu í útskrift lýkur

Í dag brautskráðust 20 nemendur af 8 námsbrautum frá skólanum. Af útskriftarnemum eru 9 dagskólanemendur, 6 dreifnámsnemendur og 5 nemendur í fjarnámi sem eru með Menntaskólann á Ísafirði sem heimaskóla. Auk þess brautskráðist einn nemandi frá Menntaskólanum í Kópavogi. 

Af braustkráðum nemendum útskrifaðist einn nemandi af lista- og nýsköpunarbraut, 4 af sjúkraliðabraut, 2 af sjúkraliðabrú, 1 nemandi úr vélstjórnarnámi A og 14 nemendur með stúdentspróf. Af stúdentum útskrifuðust 3 af félagsvísindabraut,  
7 nemendur af opinni stúdentsbraut, 3 nemendur af opinni stúdentsbraut – íþróttasviði og 1 með stúdentspróf af fagbraut.

Við óskum öllum útskriftarnemendum og fjölskyldum þeirra til hamingju og þökkum ánægjulega samfylgd í MÍ.

Föstudaginn 20. desember kl. 15:00 fer fram brautskráning í Ísafjarðarkirkju. 20 nemendur verða þá brautskráðir auk þess sem einn nemandi frá Menntaskólanum í Kópavogi fær brautskráningarskírteini sitt afhent. Viðburðastofa Vestfjarða mun senda beint úr frá athöfninni og má horfa á streymið HÉR

Nemendur í félagsvísindum opnuðu á dögunum fréttavef undir nafninu Vestur Vísir. Vefurinn er verkefni í áfanga sem Björg Sveinbjörnsdóttir kennir og nefnist inngangur að félagsvísindum. Fréttavefurinn var sameiginlegt verkefni allra nemenda og í upphafi þess þurfti  hver og einn nemandi að sækja um starf hjá vefnum. Ýmis störf komu til greina, s.s. við að skrifa fréttir, taka viðtöl, vinna fréttaskýringar, ritstjórn og vefstjórn. Nemendurnir unnu svo hver sitt hlutverk og útkoman var metnaðarfullur fréttavefur með margs konar fróðleik og áhugaverðu efni. Óhætt er að mæla með lestri vefsins, þar kemur m.a. fram að aðstandendur hans leggi áherslu á áreiðanlegar fréttir og heiðarlega umfjöllun þar sem fjölmiðlalæsi verður æ mikilvægara í heimi mikillar upplýsingaóreiðu.  

Vefinn má nálgast hér:  https://vesturvisir.wixsite.com/vesturvisir

Nemendur í félagsvísindum opnuðu á dögunum fréttavef undir nafninu Vestur Vísir. Vefurinn er verkefni í áfanga sem Björg Sveinbjörnsdóttir kennir og nefnist inngangur að félagsvísindum. Fréttavefurinn var sameiginlegt verkefni allra nemenda og í upphafi þess þurfti  hver og einn nemandi að sækja um starf hjá vefnum. Ýmis störf komu til greina, s.s. við að skrifa fréttir, taka viðtöl, vinna fréttaskýringar, ritstjórn og vefstjórn. Nemendurnir unnu svo hver sitt hlutverk og útkoman var metnaðarfullur fréttavefur með margs konar fróðleik og áhugaverðu efni. Óhætt er að mæla með lestri vefsins, þar kemur m.a. fram að aðstandendur hans leggi áherslu á áreiðanlegar fréttir og heiðarlega umfjöllun þar sem fjölmiðlalæsi verður æ mikilvægara í heimi mikillar upplýsingaóreiðu.  

Vefinn má nálgast hér:  https://vesturvisir.wixsite.com/vesturvisir